सिड्नी । मेलबर्न स्थित फुटस्क्रे पार्कमा यहि मार्च २९ तारिख शनिवार आठौं ‘विस्व नेवा दिवस’ मनाईएको छ । नेवा गुठी मेलबर्नको आयोजनामा भएको सो कार्यक्रममा नेपाल फेस्टिबल मेलबर्न २०२५ मा नेवा गुठी मेलबर्नको तर्फबाट सकृय सहभागिता जनाउनेहरुलाई लुम्बिनी-कपिलवस्तु विस्व अभियानका विस्व संयोजक रामकुमार श्रेष्ठ र भिक्टोरियाका लागि अबैतनिक बाणिज्यदूत निराजन गौलीले संयुक्त रुपमा प्रमाणपत्र प्रदान गरेका थिए । कार्यक्रममा केटाकेटीहरुको लागि खेल र धिमे बाजामा नाच गान प्रस्तुत गरिएको थियो । 

सो अवसरमा  भिक्टोरियाका लागि अबैतनिक बाणिज्यदूत निराजन गौलीले नेवा संस्कृतिको महत्वमाथि प्रकाश पार्दै मेलबर्नमा बढ्दो नेवा संस्कृतिका कार्यक्रमहरुको चर्चा र प्रसंशा गरे ।
लुम्बिनी-कपिलवस्तु विस्व अभियानका विस्व संयोजक रामकुमार श्रेष्ठले वेलायतमा करीब डेढ दशक अघि वाङमय शताब्दी पुरुष संस्कृतिविद स्व सत्यमोहन जोशी, स्व पद्मरत्न तुलाधर लगायत नेवार समुदायका दिग्गज र प्रबुद्ध ब्यक्तित्वहरुको उपस्थितिमा नेवार समुदायको ऐतिहासिक भेलाले विस्वभरी छरिएर रहेका नेवार समुदायलाई समेट्ने संस्थाको जन्म भएको र २०१८ को मार्चको पछिल्लो शनिवारलाई ‘विस्व नेवा दिवस’ मनाउन थालेपस्चात यो दिवसको ईतिहास शुरु भएको जानकारी गराए ।

उनले सांस्कृतिक बिबिधताले धनी देशको रुपमा परिचित नेपालमा सांस्कृतिक रुपमा अत्यन्तै धनी नेवार समुदायको रन्जना लिपीलाई नेपालको आफ्नोपनको रुपमा देखाएका आधारमा नेपालले संयुक्त राष्ट्र संघको सदस्यता लिन सहज भएको बताउँदै रन्जना लिपीको AAps पनि बनिसकेको जानकारी दिए । श्रेष्ठले बिगत केही बर्षदेखि मेलबर्नमा मनाउने गरिएको नेपाल सम्बतलाई नेवा गुठी मेलबर्न र नेवा पुच: मेलबर्नले संयुक्त रुपमा मनाएर निरन्तरता दिन आग्रह गरे ।
 दिलमाया श्रेष्ठ (कान्छी) को सभापतित्वमा सम्पन्न सो कार्यक्रममा नेवा गुठी मेलबर्नका सचिब सुशान्त डंगोलले स्वागत मन्तब्य राखेका थिए भने  संस्थाका अध्यक्ष माया सुवालको धन्यवाद मन्तब्य व्यक्त गरेकी थिइन् । कार्यक्रममा  दिदी-बहिनी समाज भिक्टोरियाको अध्यक्ष रोशनी श्रेष्ठ लगायत नेपाली समुदायका व्यक्तित्वहरुको सहभागिता  रहेको थियो ।