सिड्नी । अस्ट्रेलियाको न्यू साउथ वेल्स राज्यमा सन् १९९३ पछि पहिलो पटक टिटानस संक्रमणका कारण एक व्यक्तिको मृत्यु भएको छ । उक्त स्थानमा अन्य तीनजना टिटानस संक्रमित बिरामी भेटिएका छन् ।

न्यु साउथ वेल्सको स्वास्थ्य मन्त्रालयले जारी गरेको विज्ञप्तिमा सिड्नीकी ८० वर्षीया एक महिलाको गत अप्रिल १ मा टिटानसका कारण मृत्यु भएको हो । 

सन् २०१९ पछि न्यु साउथ वेल्समा टिटानस संक्रमित भएको यो पहिलो घटना हो भने सन् १९९३ पछि टिटानसका कारण मृत्यु भएको यो पहिलो घटना भएको स्वास्थ्य अधिकारीले पुष्टि गरेका छन् ।

तीमध्ये दुई जना महिलासँग टिटानस खोपको कुनै रेकर्ड थिएन भने तेस्रो महिलाले ३० वर्षभन्दा पहिले खोप लगाएको बताएकी थिइन् ।

न्यू साउथ वेल्स हेल्थकी संक्रामक रोग निर्देशक क्रिस्टिन सेल्वेले समुदाय, विशेष गरी वृद्ध अस्ट्रेलियालीहरूलाई टिटनेस खोपको साथ अद्यावधिक भएको सुनिश्चित गर्न आग्रह गरेका छन् । “टिटानस आजको विश्वमा एक दुर्लभ तर सम्भावित घातक रोग हो । टिटानसविरुद्ध खोप नै सबैभन्दा राम्रो सुरक्षा हो,” सेल्वेले भने । उनले भने, “अस्ट्रेलियामा यो रोग प्रायः वृद्धवृद्धा र विशेषगरी महिलामा यो रोग देखा पर्छ । उनीहरूले खोपको मात्रा नपुर्‍याएका कारण संक्रमण देखिने गर्छ ।”

टिटानस माटोमा पाइने ब्याक्टेरिया क्लोस्ट्रिडियम टेटानीका कारण हुने गम्भीर रोग हो । ब्याक्टेरियाले घाउमा प्रवेश गरेर विषाक्त पदार्थ उत्पादन गर्न सक्छ, जसको परिणामस्वरूप गम्भीर रोग लाग्न वा मृत्यु हुन सक्छ ।

स्रोत विभिन्न समाचार एजेन्सी